Аңыз:
Ақиқат дегеніміз не?
Осыдан көптеген жылдар бұрын
Мысыр сұлтаны әл-Мәлік ас-Салех
Наджм ад-Дин Аюбидің сүйікті әйелі
Шаджар ад-Дүр адал қызметшілерінің еңбегі
ел байлығын үстемелейтінін,
ол байлықтарды қорғау үшін
сенімді сарбаздар қажет болатынын
дөп басып айтқан еді.
Ол саудагерлер мен етікшілердің
бұндай ауыр қызметке жарамайтынын түсінген.
Ең оңтайлысы әлемдегі ең мықты жауынгерлер,
сөзге шорқақ, түксиген түркілерге қол жеткізу.
Бала кезінен бауырға бассаң тіптен жақсы.
Жетім болса құдайдың бергені.
Өйткені жетімектер
кең дүниеге өгейсіп қарайды.
Сондықтан жүрегінде аяныш сезіміне орын жоқ.
Баршаға жауыға қарайтын оларда дос та жоқ.
Тек қатыгездік пен темірдей тәртіпке көндіріп,
міндетін ұқтырсаң болғаны.
Оларға ат жалын тартқызамын деп әуреленбейсің,
жерде қобал балалар
жылқыға мінсе қанына тартып,
желдей еседі.
Және байлыққа қызықпайды.
Мұра жиып жөнсіз жанықпайды.
Олар тек бүгінгі күнмен ғана өмір сүреді.
Оларды ауыздықтап отыру керек.
Кісікиік қалпын бұзбау үшін жұртқа жуытпау керек. Аралда өмір сүрсін.
Керек кезінде көмекке шақырып аласың.
Сардарлары болуы керек.
Өйткені, тағылар әлемі күшті ғана мойындайды.
Ал күш деген – көкжал-жетекші.
Соны ұққаннан бері Мысырдың әр уәләяты гүлденіп,
байып келеді.
Оның шекараларын,
ішкі тыныштығы мен заңын
жойқын күш қорғайды.
Сондықтан жаһанда тек бір әділеттілік
– Ұлы Сұлтанның Әмірі жүрді.
Сондықтан жаһанда тек бір заң
– Ұлы Сұлтанның Сөзі би болды.
Сондықтан Әмір мен Сөзге қарсы шыққандардың барлығы Діннің жауы болып саналды.
Бұдан асқан күнә жоқ.
Мысыр елінің ақиқаты осылай қалыптасқан. Әрі қарай оқу